Քրիստոնեական դաստիարակություն

Առակներ 1: 2 - 4

 

«Ճանաչել իմաստութիւնն ու խրատը, իմանալ հանճարի խօսքերը, ընկալել խօսքի բարդ դարձուածքները, հասկանալ ճշմարիտ արդարութիւնը եւ ուղղել իրաւունքը` պարզամիտներին խորագիտութիւն եւ երիտասարդներին միտք ու հանճար տալու համար»:

     

Հայաստանյայց Եկեղեցին իր կազմավորման վաղ ժամանակաշրջանից մինչ այսօր պահապանն է հանդիսացել հայ ժողովրդի ստեղծած մշակութային բացառիկ արժեքների: Վանքերում ու Եկեղեցիներում են ստեղծվել մեր գրականության, արվեստի ու մշակույթի այնպիսի գոհարներ, որոնք փառք ու ճանաչում կարող էին բերել ցանկացած ժողովրդի: Հայ գրերի ստեղծողն Եկեղեցու վարդապետն էր, Եկեղեցու սպասավորներն էին, նաև մատենագիր մատյանների գրիչներն ու հոգևոր զմայլելի շատ երգերի հեղինակները: Հայաստանյայց Եկեղեցին ունի հսկայական մշակութային ժառանգություն` ճարտարագիտական և գեղանկարչական հուշարձաններ, հարուստ երաժշտական ու գրական գործեր: Այն միշտ անմիջական ազդեցություն է ունեցել մեր ժողովորդի նկարագրի ձևավորման գործում և օգնել է պահպանել մեր ժառանգությունը դարերի ընթացքում: Մեծ է նաև Եկեղեցու ավանդը մեր ժողովրդի հայեցի կրթության ու դաստիարակության գործում:

     Հայաստանյայց Եկեղեցին ձգտում է հավատացյալներին հաղորդել դարերի ընթացքում կուտակված պատմական և մշակութային ժառանգությունը` խոսքի, գրականության, աղոթքի և ժամերգությունների միջոցով: Եկեղեցու սրբազան ավանդույթները, հավատալիքները, խորհուրդները և ծիսական արարողությունները ծառայում են հավատացյալների հոգևոր և կրթական պահանջների բավարարմանը: Ժամանակակից հաղորդակցության միջոցները թույլ են տալիս արդիականացնել ամենօրյա դասերի մատուցման ձևերը: Ռադիոն, հեռուստատեսությունը, իսկ այժմ նաև ինտերնետը նպաստում են եկեղեցի-ժողովուրդ կապին:

     Այս բաժնում դուք տեղեկատվություն կգտնեք ծիսական արարողությունների, սրբերի, ինչպես նաև Եկեղեցու խորհուրդների, Հայաստանյայց Եկեղեցու հատուկ արարողությունների մասին: Այստեղ կներկայացվի մեր Եկեղեցու ճարտարապետական հարուստ ժառանգությունը: Դուք հնարավորություն կունենաք ծանոթանալ բազմաթիվ պատմական վայրերի` Հայաստանում և սփյուռքում:

     Սուրբ գրքի ամենօրյա ընթերցումները կթարմացվեն ամեն ամիս, իսկ եկեղեցական օրացույցը այս բաժնում կտեղադրվի ամբողջությամբ: Այս ամենից բացի կներկայացվի Եկեղեցու մշակութային և կրթական ներդրումը հայ ժողովրդի կյանքում: