1944 թ., երբ ճեմարանի վերաբացման հավանականությունն իրականություն էր դառնում, «էջմիածին» ամսագրի հոկտեմբեր-նոյեմբեր-դեկտեմբեր միացյալ համարում առաջին անգամ տպագրվեց ընդունելության պայմաններին տեղեկացնող գրություն. «Ս. էջմիածնի Հոգևոր ճեմարանը կունենա եռամյա ուսման տևողություն»: Նշված տարվանից մինչ օրս ճեմարանը գործում է:
Այժմ Գևորգյան հոգևոր ճեմարանը նույնպես ընդունելություն է կատարում: Ճեմարան կարող են ընդունվել մինչև 22 տարեկան բոլոր անձինք, ովքեր ունեն միջնակարգ կամ բարձրագույն կրթություն:
Ընդունելության համար դիմորդները ճեմարանի քարտուղարություն պետք է ներկայացնեն հետևյալ անհրաժեշտ փաստաթղթերը՝
- դիմում ճեմարանի տեսուչի անունով (լրացվում է տեղում),
- միջնակարգ (կամ ավելի բարձր) կրթության վկայական (բնօրինակը),
- զինվորական դրության մասին փաստաթուղթ (բնօրինակը),
- երաշխավորագիր թեմակալ առաջնորդից,
- բժշկական վավերացման տեղեկանք,
- բնութագիր (դպրոցի տնօրենից),
- տեղեկանք բնակավայրից,
- մկրտության վկայական,
- ինքնակենսագրություն,
- անձնագրի պատճեն,
- 2 լուսանկար (3×4):
Գևորգյան հոգևոր ճեմարանը գիշերօթիկ է, իսկ ուսուցումն՝ անվճար:
Ուսանողի առօրյան հետևյալն է.
- Վերկաց (արթնանալ)՝ 7:00,
- Առավոտյան մարմնամարզություն՝ 7:15,
- Ժամերգություն՝ 8:00,
- Նախաճաշ՝ 8:30,
- Ընդհանուր աղոթք ճեմարանի սրահում՝ 9:15,
- Դասեր՝ 9:20- 14:20,
- Ճաշ՝ 14:30,
- Ազատ ժամ՝ 15:00,
- Երեկոյան ժամերգություն՝ 17:30,
- Առաջին սերտողություն՝ 18:00,
- Ընթրիք՝ 19:30,
- Երկրորդ սերտողություն՝ 20:00,
- Ընդհանուր աղոթք քնելուց աոաջ՝ 22:00:
Գևորգյան հոգևոր ճեմարանում ուսումնառությունը 6 տարի է: Կրթությունն իրականացվում է Հայաստանի Հանրապետության բուհերում ընդունված երկաստիճան համակարգով՝ բակալավրիատ և մագիստրատուրա: Ճեմարանի մասնագիտական ուղղվածությունն աստվածաբանական է, բայց առարկայացանկը հագեցած է նաև հայագիտական դիսցիպլիններով: Ուսումնական ծրագիրն այնպես է դասավորված, որ առաջին երեք լսարաններում սաները մեծ չափով ուսումնասիրում են հայագիտական առարկաներ, իսկ բարձր լսարաններում գրեթե ամբողջությամբ ուսումնասիրում են կրոնական-աստվածաբանական առարկաներ և մասնագիտանում դրանց մեջ:
Ա լսարանում դասավանդվում են՝ Հայոց լեզու, Խոսքի մշակույթ, Գրաբար, Ռուսերեն, Անգլերեն, Հայ հին գրականություն, Հայոց պատմություն, Կրոնների պատմություն, Աստվածաշնչի պատմություն, Հայ Եկեղեցու պատմություն, Ընդհանուր եկեղեցական պատմություն, Քրիստոնեական, Եկեղեցական երաժշտություն, Սոլֆեջիո, Ինֆորմատիկա:
Բ, Գ և Դ լսարաններում դրանց ավելանում են այլ առարկաներ՝ Արևմտահայերեն, Հին հունարեն, Հայ նոր գրականություն, Համաշխարհային գրականություն, Տրամաբանություն, Փիլիսոփայություն, Հայ եկեղեցական մատենագրություն, Հայրաբանություն, Աստվածաշնչի աշխարհագրություն, Հին Կտակարանի ներածություն, Նոր Կտակարանի ներածություն, Աստվածաշնչի մեկնություն և մեկնաբանություն, Վարդապետական աստվածաբանություն, Տոնագիտություն, Ծիսագիտություն:
Վերջին երկու Ե և Զ լսարաններում սաների ուսումը շարունակվում է մագիստրատուրայում, ուր ուսումը իրականացվում է մասնագիտական չորս հոսքերում՝ Աստվածաշնչագիտություն, Պատմական աստվածաբանություն, Դավանաբանություն, Գործնական աստվածաբանություն: Այստեղ սաները խորացնում են իրենց գիտելիքները՝ ըստ իրենց նախընտրած ուղղությունների՝ յուրաքանչյուր հոսքին հատուկ մասնագիտական ծրագրերի համապատասխան: Միևնույն ժամանակ գոյություն ունի բոլոր հոսքերի համար պարտադիր դասընթացների առարկայախումբ, որի շնորհիվ ապահովվում է ճեմարանական կրթության միասնականությունը մագիստրատուրայում:
Գևորգյան հոգևոր ճեմարանում դասավանդվող առարկաների ընդհանուր թիվը ներկա դրությամբ հասնում է 60-ի: Դասախոսական կազմը ևս շատ հարուստ է. ճեմարանում դասավանդում են 45 մանկավարժներ:
Ուսանողները Բ լսարանում ստանում են դպրության չորս աստիճաններ, իսկ Ե լսարանում ձեռնադրվում են սարկավագ:
Սաներն ավարտում են իրենց կրթությունը ավարտական որակավորման քննություններով և մագիստրոսական թեզի պաշտպանությամբ:
Նորին Սրբություն Գարեգին Բ Ամենայն Հայոց Կաթողիկոսը, լինելով Գևորգյան հոգևոր ճեմարանի հիմնադիր նախագահը և Գիտական խորհրդի նախագահը, գլխավորում և ուղղություն է տալիս Գևորգյան հոգևոր ճեմարանի ողջ գործունեությանը:
Դասախոսական կազմը երբեք չի մոռանում հայ միջնադարյան մեր հոգևոր դպրոցների՝ էջմիածնի, Տաթևի, Հաղպատի, Սանահինի, Գլաձորի, Սև լեռան Կարմիր վանքի, Երուսաղեմի, Արմաշի և այլ վանական դպրոցների ավանդությունները և ողջ ժառանգության դերն ապագա եկեղեցականների ձևավորման ու դաստիարակության գործում:
Այսօր ճեմարանի տեսչության և դասախոսական կազմի առջև խնդիր է դրվել դառնալ ավանդույթների և վանական կյանքի հետ առնչվող սովորությունների սրբության կրողը՝ շարունակելով կրոնական ուսումնական հաստատությունների գործը, ինչպես նաև, օգտագործելով գիտական և մանկավարժական արդի մեթոդները՝ ուսումնական հաստատությունը բարձրացնել արդիական պահանջների մակարդակի: