Ս․ Տրդատ արքայի բաց խորանը կառուցվել է 2001 թ. (բարերաներ՝ Լուիզ Մանուկյան Սիմոն, ճարտարապետներ՝ Տիար Ջիմ Թորոսյան, Տիար Ռոմեո Ջուլհակյան)` ի նշանավորումն Հայաստանում քրիստոնեության պետական կրոն հռչակման 1700-ամյա հոբելյանի:
Բաց խորանի վրա է օրհնվում սրբալույս մյուռոնը, կատարվում խաղաղօրհնության, նռնօրհնեքի և այլ արարողություններ։ Խորանի առջև ձևավորված է ընդարձակ տարածք, որպեսզի մեծաթիվ հավատացյալներ կարողանան միաժամանակ մասնակցել հոգևոր արարողություններին։ Խորանին կից ճարտարապետական նույն ոճով կառուցված է մայրավանքի տարածքի գլխավոր մուտքը: